بتاع الدليفرى
مش عارفه اللي أنا بعمله ده صح ولا غلط.. أنا وثقت فيه بسرعه جدا وأديتله فرصه أنه يطلع كل حاجه وحشه جواه وهو معايه بس ماعملش حاجه وكان بيبقى محرج.. أنا عارفه اللي عملته غلط بس ماقدرتش أكذب إحساسي نحيته وتحليلي لشخصيته هو ماكنش هيعمل كده وأنا واثقه مليون في المية من ده
-فكرك ياخرشومي هيقولي بحبك ولا هيقولي نبقى صحاب ؟!
-أنا كده كده مش هزعل..أصل أي حد زيه هيقولك ما أخد واحده صغيره بس مع الايام هيعرف أنها مش بتفرق صغيره من كبيرة.. اللي بيفرق الفكر والروح.. في واحده عندها 25 سنة وتلاقيها عجوزة بتفكيرها ونشاطها وإقبالها على الحياة.. وواحده ممكن تعدي ال50 ولسه عندها طموح وأمل وعايزة تعمل حاجات كتير.. أنت نمت !!
هيقولوله ليه تاخد واحده أكبر منك..ما تاخد بنت خالتك ولا بنت عمك..وأنتوا مالكوا ما تسيبوا الناس في حالها ليه بتدخلوا في كل حاجه..من غير ما أحس لقيتني قعدت عالسرير وبحرك أيدي في الهوا كاني بتخانق وخرشوم رفع راسه وبص عليا كده وهو مستغرب ومخضوض وبعدها حط راسه على ايده ونام تاني
رجعت نمت عالسرير تاني.. وسمعت صوت رساله عالواتساب.. فضلت شويه قبل ما افتحها بس ما بعرفش اتقل ماعداش ثانيه ومسكت الموبايل عشان أشوف رده أيه ؟ لقيته واحد تاني معايه في النادي مصمم يتعرف عليا عملتله بلوك وحطيت الموبايل تاني على جنب وساعتها غرقت في النوم
ماعرفش ليه سميته خرشوم بس حسيته خرشوم في نفسه.. عنده كبرياء كده وعزة نفس.. وكنت عايزة أسميه أسم جديد اللي يسمعه من أول مرة يحفظه
ماعرفش هو مبسوط بالأسم ولا لأ بس الأكيد أنه أتعود عليه
فضلت أقلب في التلفزيون وشويه في الموبايل لحد ما جعت والساعه داخله على 1 تقريبا..أنا متعوده أكل قبل نومي بـ3 ساعات وبنام 4 وبصحى 9 دايمًا.. مسكت الموبايل وفكرت أتصل بالمطعم اللي كان فيه كريم.. بس قولت بلاش..معرفش ليه بلاش بس مارضتش أتصل بيهم
حسيت لو حد تاني غير كريم جه مش هحس بطعم الاكل.. اتصلت بمطعم تاني.. وكنت طول اليوم ماسكه الموبايل وعايزة اتصل على كريم أسئله أخبار الشغل الجديد أيه مبسوط.. مش مبسوط طب تحب تيجي تشتغل معايه ؟!
بس خلاص انا رميت الكرة في ملعبه وهو اللي المفروض يتصل بيا ويقولي قرر أيه ؟
عدت الأيام بسرعة وكانت شبه بعضها... وبالنهارده يكون عدى على أخر مرة شوفت فيها كريم سبع أيام
